Колумни

Ред е и ние Македонците еднаш за нешто самите да се избориме!

Бранко Героски

Три фактори доведоа до осамостојување на Република Македонија пред четврт век – пропаста на комунизмот, распаѓањето на Југославија и демократизацијата на македонската комунистичка партија под водство на Петар Гошев. Ниту еден од тие процеси не зависеше од желбата и од волјата на македонскиот народ. Тоа е историски факт!

За разлика од Словенците и Хрватите, на пример, кои за независност сонуваа, ама и работеа, најмалку една деценија пред распаѓањето на Југославија, ние, Македонците, со исклучок на неколку репресирани политички маргиналци дома и во дијаспората, за осамостојување од федерацијата почнавме да зборуваме дури кога стана јасно дека Југославија конечно ќе пропадне и кога македонските комунисти овозможија и поттикнаа плурализам во политичкиот живот и кај нас. Тогаш се појавија партии и поединци како Љубчо Георгиевски, кои проговорија за независност. А проектот на осамостојување го спроведоа првата македонска експертска влада и политичката екипа на Бранко Црвенковски и на Киро Глигоров.

Тоа е вистината за нашето осамостојување. Не ви се допаѓа? Спротивна е на наративите за осамостојувањето како јуначка епопеја и како остварување на историските стремежи на македонскиот народ? Гајле ми е! Не ме интересираат лаги! Вистината е таа и мора да биде јасно кажана, најмалку од две причини.

Прво, најголем дел од денешната генерација млади македонски политичари, во годините на осамостојувањето на Македонија, воопшто не учествуваа во тие процеси – дел од нив биле премлади за да имаат било каква свесност за политиката воопшто, а дел, пак, не биле заинтересирани ни за Македонија ни за општеството во кое растеле. А денес ни прикажуваат бајки за својата „историска улога“ во растежот на независна Македонија.

Второ, сите ние во овие 25 години проживеавме се и сешто, главно маки и страданија. Но, ништо не може да се спореди со овие црнила што ни ги затруја душите во овие десет години владеење на хунтата на Никола Груевски. Независна Македонија денес пропаѓа во мизерија и во безнадежност. Затоа, оваа генерација Македонци има обврска на 11 декември да си ја поврати државата и да ја осамостои од оваа криминална банда што ја има окупирано и којашто крвнички ја уништува.

Деновите на хунтата се избројани. Тоа го знаеме сите. Вака или онака, до промени ќе дојде. Порано или подоцна. Но, не е сеедно дали тоа ќе се случи порано или подоцна и дали ќе биде вака или онака. Ред е и ние Македонците еднаш за нешто самите да се избориме. Да не биде после, на 50-годишнината од независноста, некој како мене да не потсетува дека после четврт век самостојност, со Македонија владеел некој лудак, но дошол шумарот и го избркал лудакот, па така сме се спасиле. Резултатот е ист, но чувството е многу, многу лошо.



Поврзани вести

Напишете коментар

Back to top button

Детектиран Блокатор

Ве молиме да го исклучите вашиот блокатор за реклами на вашиот пребарувач за овој сајт, со истото би дале поддршка за повеке вести.