Забава

Напредно македонско семејство, тате во властта. мама во опозиција а јас и бате на школо во странство

AФОРИЗМИ ЗА ВРЕМИЊА КРИЗНИ

 

 

 

– Кај нас најслабо се плаќаат писателите, а најдобро идиотите.

– Од народната мудрост живеат поединци во фолклорните институти.

– За пијаните од власт фајронт се изборите.

– Го најавивме нашиот напредок, многумина добродушно се пријавија да не закопаат!

– Политичкиот дресер од државата прави циркус!

– Засукајте ги ракавите и подајте ги рацете, за Македонија можеби сепак некогаш ќе има Донаторска конференција.

– Од многу тапкање по рамо…Македонија заглиби во кал!

– Високоморалните обично ги фаќаат во неморал.

– Властта нема појма од математика, опозицијата ја помножи со нула.

– И ние имаме коњи за трка, само првин да ги извеземе магарињата!

– Сиромаштијата во Македонија не е случајна, сето тоа некој добро ни го испланирал!

– Полните со идеали и фантазии обично имаат празни џепови.

– Вардар ќе однесе многу глупости, ама кај да ги витосаме глупаците?

– Се е во знакот на историските традиции, Албанците сакаат земја, а ние иселенички карвани.

– Господа политичари, ве молам помогнете ми, гладен сум.

– За распекмезените буџетари следува ли уште канта сирење од Синдикат?

– Колку политичарот е повисоко, толку народот ретко го гледа…

– Не давајте им вода на политичарите, многу плукаат!

– Да не беше судирот со терористите 2001-ва немаше да знам дека во Тетово имало еден куп села.

– Независните во политиката зависат од банкарски кредити.

– Според фотељата и газ му дадоа.

– Животот е една голема лепешка прилепена за нашите петици.

– Догодина е изборна година , политичарите ќе не бираат.

– Ние му верувавме до крај…на неговиот мандат.

– Цел живот се фалеше дека бил во вистинската партија на крај прејде во владејачката.

– Во минатото луѓето пееле за ламји и чудовишта оти не знаеле за Златна зора.

– Во Македонија тераме нова мода, политика на скинат џеб.

– Во држава на ползачи и молзачи нема млеко наутро.

– Многу градски татковци изгледа заборавија од кое село ги прибравме.

– Победата морално ги порази.

– До пред дваесет години бевме убедени социјалисти, денес сме социјални случаи.

– Господа ве молам апалуз, ќе ни заспие говорникот.

– Достоевски умре, идиотите преживеаја.

– Христос се роди, демократијата слави.

– Не сум агресивен докторе, само лаам на политичките митинзи.

– За нашите грешници грешките ни судат.

– Политичарите не се купуваат ами поткупуваат.

– На распродажба најниска цена добива…народот.

– Секогаш има време за љубов и време за омраза, време на војна и време на мир.

– Македонскиот ќорсокак е историски феномен. Идните генерации ќе не изучуваат во поглавјето “КАКО НЕ СЕ ПРАВИ ДРЖАВА”.

– Странците ни удираат четки за нашата државничка зрелост. Ние пак црвенееме од срам.

– Само во Македонија една Влада претставува федерација на автономни партиски министерства.

– Изгласавме што изгласавме сега парите и партиите се на потег.

– Во Македонија има одлични услови за напредок на марихуанта и организираниот криминал…

– Капиталот и денес е на цена само Маркс го заборавивме.

– Дплгите умишта кратко сечат.

– Во минатото оној кој не ги обесуваше нивните слики на зид го бесеа на дрво.

– Задоволство ми е да работите за мене, штом парите воопшто не ви се битни.

– Не размислувате? Па вие воопшто не личите на странец како да сте еден од нас.

– Ви ја подарувам мојата чиста совест, а за син ми вилата на Водно.

– Нашите политичари се медицински феномен, му задаваат главоболка и на аспиринот.

– Само без чевли умее да изброи до дваесет…пратеници.

– Сите политички приказни имаат среќен крај, имено сите се среќни кога ќе завршат.

– Ако со ѓаволот тикви садиш, твоите деца на Бит-Пазар семенки ке продаваат.

–  Политичари ако не можете добриот стандард, барем вратете ни ја младоста?!

– Еврото глуми на сцена, ама доларот сеуште режира и суфлира.

– Имаме богат медиумски пазар, ама осиромашени информации.

– Повлекоа линија на разграничување сега секој ќе си пука во својот двор.

– Комшија кажи бе нешто убаво? Море марш у…

– Роди ме мајко и фрли ме во..Управен одбор.

– Кога државата има проблем со слухот се служи со доушници.(позајмен море украден).

– Тој е многу контраверзен политичар, едни го мразат, а други ама ич не го сакаат.

– Младите ги имаат идеите, а старите ги имаат пензиите. На младите светот останува…празен.

– Еј, кради со усул и ред, нека има и за мојот џеб.

– Тој ЗАГИНА, а болеста, хм дополнително ќе ја договориме.

– Имотот нека му биде утеха за се, богами добро се утешил.

– Клетвите ги измисли народот- за народните избраници!

– Спортски тип сум секогаш им дозволувам на автомобилите да ме претекнат.

– Некои од алкохолот извлекоа повеќе отколку тој од нив.

– Не се ни претстави, а ни ги кажа сите негови титули.

– Децата се нашето принудно богатство.

– Криминалец со тапија, завршил политичка школа.

– За глупавиот син работи ксметот на неговиот богат тате.

– Говорат македонски, а озборуваат на дијалект.

– Ситуацијата мора да смрди штом се обидуваат да ни ги покријат очите.

– Умри комшија и остави ми ја козата намира!

– Во наследство ни останаа само наследните болести од дедо и баба.

– Тепајте ги децата за да не јадете ќотек за нив.

– Оние што се разбираат во секоја работа, обично се невработени.

– За да не го нарекуваат сељак продаде се што имаше по село.

– Не гласајте за него, тој е добар човек властта ќе го расипе.

– Неговата смрт никој не ја заборави, на сите им должеше.

– Напредно македонско семејство, тате во властта. мама во опозиција а јас и бате на школо во странство.

– Кај нас најмалку ти лаеле кучињата.

– Човек, како тоа смешно ѕвучи.

– Не фаќајте го за збор, фатете го за гуша.

– Другар на мака се познава, а роднина на софра.

– Животните кога се сити мируваат, а луѓето побеснуваат.

– Тој што ќе ја обедини Македонија во знак на народно признание и љубов- веднаш да се уапси!

– Ваше, нивно, сечие, мое…приватизирано  или денационализирано.

– Со големи пари обично се купуваат евтини луѓе.

– Убава жена и Македонските граници секогаш предизвикувале кавги.

– За татковината падна..од кревет!

– Љубовта е слепа се додека не и погледнеш меѓу нозе.

– Се ме боли како да не ме правеле луѓе ами работници на Орка во втора смена.

– Жената прво ви мириса на цвеќе а после ве апе како пчела.

– Љубовта боли, а јас сум ќорав, рече зајакот и се симна од ежот.

– Лекот не делуваше, на пациентот му истече рокот на употреба.

– Децата и будалите не знаат да лажат…другите сушат.

– Читателите сакаат книги, а писателите хонорарите…

– Мамо дај чеканот, тато има мува на главата и две швалерки!

– Додека има немажени девојки и јас не се женам.

– Добра кола има комшијата цирка четарсто коња, штета што внатре се вози едно обично магаре.

– Жена ми побегна со мојот најдобар другар. Тој многу ми недостасува.

– Машките не ги бидува за музика играат како што им свират жените.

– Дебел е, мора да растел кога на времето месото беше евтино.

– Ако дигаме прст со што да чепкаме по контејнерите???

– Човек секогаш во џеб треба да има полн паричник. Долгите прсти не сакаат тенки џебови.

– Тој странки прима понекогаш, а пари зема секогаш.

– Политичарите и музичарите се исти пеат туѓи песни.

– Им дадоа одврзани раце, а овие си го врзаа ќесето.

– Ве јавнале? Па што им се веднете?

– Внимание и ушите имаат зидови.

– Ај што нема мед и млеко ама летоска и вода фалеше..

– Додека на запад избива квалитетот на површина, кај нас избива…војна.

– Најпрвин беа новинарите потоа настанаа проблемите.

– Политичарите си ја префрлаат топката, а народот прима голови.

Народот ВЕРУВА…дека политичарите лажат..

– Чудни некои политичари имавме во минатото, имаа маратонски склоности, крадеа што крадеа па трк во странство со туѓ пасош, а нашето стопанство како полжавче.

– Не учете го Македонецот да го врти образот туку покажете му како да ги користи рацете.

– Ја преспавме иднината на своите деца.

– Нека се живи и здрави идните поколенија тие ќе ги враќаат нашите задолженија.

– Не  е тешко школото, скапа е школарината!

– Празниците поминаа, а ние останавме во Македонија…

– Кој се лути нека му стои, господ здравје да му даде на авторот.



Поврзани вести

Напишете коментар

Back to top button

Детектиран Блокатор

Ве молиме да го исклучите вашиот блокатор за реклами на вашиот пребарувач за овој сајт, со истото би дале поддршка за повеке вести.